UN yatuma wachunguzi Burundi.

Siku moja tu baada ya Umoja wa Afrika kutangaza kwamba utawapeleka waangalizi 100 wa haki za kibinaadamu pamoja na waangalizi wengine 100 wa kijeshi nchini Burundi,

Sasa umoja wa mataifa pia unasema kuwa utawapeleka maafisa wake wa upelelezi nchini humo ilikutathmini iwapo kuna visa vyovyote vya ukiukaji wa haki za binadamu nchini humo.
Taarifa ya Umoja wa mataifa inasema kuwa wachunguzi 3 kutoka Algeria, Colombia na Afrika Kusini watafanya shughuli yao kwa juma moja kuanzia Machi tarehe mosi.
UN inasema kupitia kwa taarifa yake kuwa inalenga kuchunguza na kubaini wale wanaochochea na kupanga matukio ya ukiukwaji wa haki za kibinadamu nchini humo.

Afisa wa umoja huo bwana Christof Heyns anasema ripoti ya watatu hao itakuwa huru.

Juma lililopita rais wa Afrika Kusini bwana Jacob Zuma aliongoza ujumbe wa viongozi watano wa Afrika katika ziara ya siku mbili wiki hii mjini Bujumbura walikofanya mazungumzo na Nkurunziza.
Burundi imekumbwa na machafuko tangu Nkurunziza atangaze nia ya kuwania muhula wa tatu Aprili mwaka jana.
Wapinzani wake wanadai kuwa muhula huo wa tatu unakiuka katiba ya nchi.
Lakini Nkurunziza anadai kuwa muhula wa kwanza aliotawala ilikuwa ni kipindi cha mpito kufuatia mazungumzo ya amani.
                                             chanzo bbc.